Librarians’ Notes (4)

နိုင်ငံတစ်နိုင်ငံ ဖွံ့ဖြိုးတိုးတက်ရေး၊အခြားသောနိုင်ငံများနှင့်ရင်ပေါင်တန်းနိုင်ရေးအတွက် ပညာရေးကဏ္ဍသည် အလွန်အရေးကြီးပါသည်။ အတွေးအခေါ်ပညာရှင်များ၊စာရေးဆရာများပြုစုရေးသားခဲ့သော စာအုပ်စာတန်း များကို လေ့လာဖတ်ရှုမှီငြမ်းခြင်းမှ ရရှိလာသည့် အသိပညာအတတ်ပညာများကို အခြေခံကာ နှောင်းလူတို့က နယ်ပယ်အသီးသီးတွင်အစဉ်မပြတ်ဆင့်ကဲကြံဆတီထွင်ခဲ့ကြပါသည်။
ယင်းတို့၏အောင်မြင်မှုအကျိုးဆက်ကို ယနေ့လူသားအားလုံး ခံစားရရှိနေကြပြီဖြစ်ပါသည်။ဥပမာပြရသော်၊ ပြင်သစ်စာရေးဆရာ ဂျူးလ်စ်ဗန်း( Jules Gabriel Verne, 1828-1905)ရေးသားခဲ့ပြီး ၁၈၆၅ ဝန်းကျင်၌ ထုတ်ဝေခဲ့သော သိပ္ပံဝတ္ထုများတွင်ပါရှိသည့် ကမ္ဘာ့ဆွဲအား၊လကမ္ဘာနှင့်ပင်လယ်ရေအောက်ခရီးဇာတ်လမ်းများကြောင့် ၁၉၆၉ ဧပြီလတွင် လကမ္ဘာ၌ ခြေချ နိုင်ခြင်းတို့သည် စာပေ၏အကျိုးကျေးဇူး ဖြစ်ပါသည်။
ပေ၊ပုရပိုက်ကဲ့သို့သော ရှေးဟောင်းလက်ရေးစာများမှ တစ်ဆင့် ယဉ်ကျေးမှု၊လှုမှုရေး၊ စီပွားရေးစသည့်တို့၏ သမိုင်းကြောင်းအစဉ်ကို လေ့လာသိရှိနိုင်ပါသည်။ တန်ဖိုးမဖြတ်နိုင်သောစာပေများကို မပျောက်ပျက်အောင် ထိန်းသိမ်းနိုင်သည့်တစ်ခုတည်းသောနေရာမှာစာကြည့်တိုက်ဖြစ်ပါသည်။ စုဆောင်းဝယ်ယူနေမှုကြောင့် စာအုပ်အသစ်များတိုးပွားများပြားလာသော်လည်း မူလရှိပြီးစာအုပ်များကို စွန့်ပစ်လိုက်ခြင်း မပြုပါ။ မှီငြမ်းအသုံးပြုနိုင်ရန်အတွက် ထိန်းသိမ်းထားရှိပါသည်။ စုဆောင်းထားရှိသည့် စာပေပစ္စည်းများကို စာရင်းတင်ခြင်း၊ စာဖတ်သူများအား ဝန်ဆောင်မှုပေးခြင်းကို စာကြည့်တိုက်မှူးနှင့်ဝန်ထမ်းများက တာဝန်ခံဆောင်ရွက်ပါသည်။
စာဖတ်သူ၏လိုအပ်ချက်ကို ထိရောက်စွာ ဖြည့်ဆည်းပေးနိုင်ခြင်းသည်လည်း စာကြည့်တိုက်မှူး၏ကောင်းမွန်သည့် အရည်အသွေးဖြစ်ပြီး ယင်း အရည် အသွေးကို အစဉ်မြှင့်တင်ပေးနိုင်စွမ်း ရှိနေရပါမည်။
စာကြည့်တိုက်ပညာရှင်များ၊စာကြည့်တိုက်မှူးများနှင့် စာကြည့်တိုက်ဝန်ထမ်းများဖြင့် ဖွဲ့စည်းထားသော မြန်မာနိုင်ငံစာကြည့်တိုက်အသင်းသည် မြန်မာနိုင်ငံဖွံ့ဖြိုး တိုးတက်လာစေရန် တစ်ဖက်တလမ်းမှ အားဖြည့်ဆောင်ရွက်လျက်ရှိနေပါသည်။
စာကြည့်တိုက်လုပ်ငန်း ကျွမ်းကျင်သူများတိုးပွားလာစေရန် ပုံမှန်သင်တန်းဖွင့်လှစ်ခြင်း၊ အွန်လိုင်းဖြင့် သင်တန်းပို့ချခြင်း၊ စာကြည့်တိုက် များအား နည်းပညာအထောက်အကူပေးခြင်း၊ပညာရေးဝန်ကြီးဌာနနှင့်ညှိနှိုင်းပြီး အခြေခံပညာ ကျောင်းများရှိ စာကြည့်တိုက်များပိုမိုဖွံ့ဖြိုးလာစေရန်အတွက် စာကြည့်တိုက်လုပ်ငန်းကို စိတ်ဝင်စားသည့် ဆရာ၊ဆရာမများကို သင်တန်းပေးခြင်း၊ အလှူရှင်များ၏ပံ့ပိုးလှူဒါန်းမှုတို့ဖြင့် စာအုပ်စာတန်းများ၊ စာကြည့် တိုက်ပရိဘောဂများ ဖြည့်ဆည်းပေးခြင်းစသည်တို့ဆောင်ရွက်လျက်ရှိရာ ယခုအခါ ကျောင်းပေါင်း(၃၇၆)ကျောင်းအတွက် ဆောင်ရွက် ပေးနိုင်ခဲ့ပါသည်။ ဤလုပ်ငန်းကို တိုးချဲ့ဆောင်ရွက်နိုင်ရန်အတွက် အသင်းဝင်များကလည်း ပါဝင်ကူညီပေးကြ ပါရန် ဖိတ်ခေါ်ပါသည်။
“Once a Librarian, Always a Librarian” ဟူသည့်စကားနှင့်အညီ စာကြည့်တိုက်မှူး တစ်ယောက်ဖြစ်လာလျှင် တစ်သက်လုံးစာကြည့်တိုက်မှူးဖြစ်သည်ကို မမေ့ကြရန် သတိပေးနှိုးဆော်အပ်ပါသည်။

​ဦးတင်မောင်လွင်
နာယက
မြန်မာနိုင်ငံစာကြည့်တိုက်အသင်း