PROUD TO BE A LIBRARIAN

စာကြည့်တိုက်မှူးဖြစ်ရတာ ဂုဏ်ယူကြပါစို့

MLA (Myanmar Library Association) က မှတ်သားစရာစကားနှင့် ဆရာဖြတ်သန်းခဲ့ရသော စာကြည့်တိုက်မှူးဘဝ အတွေ့အကြုံလေးတွေပြောပြပေးပါလို့ ဖုန်းဆက်လာပါတယ်။

PROUD TO BE A LIBRARIAN
စာကြည့်တိုက်မှူးဖြစ်ရတာ ဂုဏ်ယူကြပါစို့

“စာကြည့်တိုက်မှူးဆိုတာအသိပညာဖြန့်ဖြူးပေးနေရသော ပရဟိတသမားတွေပါ။”
စာကြည့်တိုက်မှူး ဆိုတာက အသိပညာဖြန့်ဖြူးနေကြသူတွေဖြစ်တော့ သုတ၊ရသဆိုင်ရာစာပေအားလုံးကို ဖတ်နိုင်သလောက်၊ လက်လှမ်းမှီသလောက် ဖတ်ရှုဖို့လိုပါတယ်။ အနည်းဆုံးတော့ စာအုပ် တစ်အုပ်၏ မာတိကာ၊နိဒါန်း၊အမှာစကား တို့ကို ဖတ်ထားကြဖို့ လိုအပ်ပါတယ်။ စာဖတ်သူများ(Users)လိုချင်သော သတင်းအချက်အလက်ကို အမြန်ဆုံး၊အချိန်တိုအတွင်း ရှာဖွေ လမ်းညွှန်နိုင်မှသာ စာကြည့်တိုက်၏ရည်ရွယ်ချက်အောင်မြင်နိုင်ပါတယ်။စာဖတ်သူများအားကိုးထိုက်သော စာကြည့်တိုက်တစ်ခုဖြစ်လာနိုင်ပါတယ်။

နိုင်ငံခြားတက္ကသိုလ်ပါမောက္ခတစ်ဦး၏ အဆိုအမိန့်တစ်ခုကိုဖတ်ဖူးခဲ့ပါတယ်။ ဆရာကောင်းတစ်ယောက်ဖြစ်ဖို့လွယ်ကူသော်လည်း စာကြည့်တိုက်မှူးကောင်းတစ်ဦးဖြစ်ဖို့ မလွယ် ကူကြောင်း မှတ်တမ်းစကားပြောကြားခဲ့တာဖတ်ဖူးခဲ့ပါတယ်။
“It is better to be a good teacher but not a good librarian”
ဤမှတ်သားစရာစကားလေးကို ရင်ဝယ်စွဲလန်းပြီး နေ့စဉ်တိုးတက်ပြောင်းလဲနေသော သိပ္ပံ၊ဝိဇ္ဇာ၊ နည်းပညာဘာသာရပ်တွေကို မျက်ခြေမပြတ် လေ့လာနေဖို့လိုပါတယ်။
စာကြည့်တိုက်မှူးကောင်းတစ်ယောက်ဖြစ်ချင်ကြပါက စာဖတ်နာကြပါ။ တိုးတက်ပြောင်းလဲနေသော ကမ္ဘာကြီးမှာ ယှဉ်ပြိုင်နိုင်ဖို့အတွက် ကွန်ပျူတာနဲ့နည်းပညာတွေ ပိုမိုတတ်ကျွမ်းအောင်ဆောင်ရွက်ထား ကြရပါမယ်။
စာကြည့်တိုက်မှူးတွေမှာ ထိုက်သင့်သော အင်္ဂလိပ်စာတတ်ကျွမ်းဖို့လိုအပ်ပါတယ်။အင်္ဂလိပ်ဘာသာ စကားကို ပြောနိုင်ရေးနိုင်သည့် အထိလေ့လာတတ်ကျွမ်းဖို့လိုအပ်ပါတယ်။
အဘယ်ကြောင့်ဆိုသော် စာကြည့်တိုက်မှူးဆိုတာနိုင်ငံတကာနဲ့ရင်ဘောင်တန်းနေကြတာမို့
(၁) စာကြည့်တိုက်မှူးတွေရဲ့အရည်အသွေးမြှင့်နေကြရမယ်။
(၂) စာကြည့်တိုက်တွင်စုဆောင်းထားသော စာအုပ်စာတမ်း၊စာပေပစ္စည်းများသည် ခေတ်မှီနေရမည်။ စာအုပ်စာတမ်းများသည် အမြဲတမ်း၊တတ်နိုင်သလောက် ခေတ်နောက်ကျနေတာမျိုး မဖြစ်စေရပါ။ သင်ကြား ရေးဆိုင်ရာတက္ကသိုလ်များအတွက် ဤအရာသည်အလွန်အရေးကြီးပါတယ်။
(၃) စာကြည့်တိုက်မှူးတွေသည် ဘာသာစကားတစ်မျိုးထက်မက တတ်ကျွမ်းထားပါက ပိုမိုကောင်း မွန်ပါတယ်။

စာကြည့်တိုက်မှူးဆိုတာက၊
❖ ပညာရှာသူ တို့ဝိုင်းကူ
❖ ဖြန့်ဖြူးပညာ တို့ဝန်တာ…… ဆိုသောဆရာကြီးများ၏ လမ်းညွှန်ဆောင်ပုဒ်များအတိုင်း
မိမိတာဝန်ထမ်းဆောင်ရာ နေရာ၊ဒေသတို့တွင်လိုအပ်နေကြသောအသိပညာဖြန့်ဖြူးရေးဖြစ်သောစာကြည့်တိုက်ပညာများကို လက်ဆင့်ကမ်းဆောင်ရွက်ကြရန်လိုပါတယ်။
စာကြည့်တိုက်နှင့် သုတပညာဖြင့် လောကကိုအသိပညာဖြန့်ဖြူးကြပါစို့…

ဦးဥာဏ်ထွန်း
နာယက
မြန်မာနိုင်ငံစာကြည့်တိုက်အသင်း

စာကြည့်တိုက်မှူးအဆင့်(၁)(ငြိမ်း)
မန္တလေးတက္ကသိုလ်

Chief Librarian
ILBC (MDY) စာကြည့်တိုက်မှူး