“ဘယ်လိုစာတွေရှာပြီးဖတ်ကြရမှာတုံး”

နည်းပညာသစ်ကြောင့် ပညာရပ်သစ်တွေနေ့စဉ်နဲ့အမျှတိုးနေတယ်။ ပြောရရင် “မနေ့ကတွေ့တဲ့သူနဲ့ ဒီနေ့တွေ့တဲ့သူ မတူပါဘူးကွယ်”ဆိုတဲ့ သီချင်းစာသားလို၊မနှစ်ကသင်တဲ့ သင်ခန်းစာအချို့ဟာ ဒီနှစ်မှာ (Out Dated)ဖြစ်ကုန် ကြတယ်။ အထူးသဖြင့် သိပ္ပံဆိုင်ရာတွေ့ရှိချက် အသစ်အသစ်တွေနေ့စဉ်နှင့်အမျှ ပေါ်ထွက်လာသလို၊ မသိရှိသေးတဲ့ ဝိဇ္ဇာပညာရပ်ဆိုင်ရာတွေကို စူးစမ်းလေ့လာဖော်ထုတ်ဖို့လိုပါတယ်။ဥပမာ- ရောဂါကုထုံး တွေလည်းပြောင်းတယ်။ ဆေးဝါးတွေလည်း ပြောင်းတယ်။ရှေးဟောင်းယဉ်ကျေးမှု‌အမွေတွေ ရှာဖွေဖော်ထုတ်နေကြတယ်။

ဒီတော့ကျနော် တို့(စာကြည့်တိုက်ဝန်ထမ်းတွေ၊ ပညာရှင်တွေ၊စာဖတ်သူတွေအားလုံး)က၊ ခေတ် အလိုက်ပြောင်းလဲတိုးတက်မှုတွေ ကို အမီလိုက်နေမှတော်ကာကျမယ်။မိမိအသက်မွေးဝမ်းကျောင်းပညာ(Professional field)ကိုပဲ အာရုံစိုက်ဖတ်ရမှာ လား။မဟုတ်ရေးချမဟုတ်ရပါ။

မြန်မာနိုင်ငံသားဖြစ်တဲ့အတွက် မြန်မာ ယဉ်ကျေးမှုထုံးတမ်းဓလေ့၊ စာပေ၊သမိုင်း ကြောင်းတွေကိုလည်း တီးမိခေါက်မိတဲ့ အထိဖတ်ဖို့လိုတယ်။ဒါမှ မြန်မာနိုင်ငံရဲ့ ပင်ကိုယ်ဖြစ်တည်မှု(National identity)ကို ကျနော်တို့ ထိန်းသိမ်းထားနိုင်မယ်။ နောက်မျိုးဆက်သစ်တွေကို ကျနော်တို့အမွေကောင်းတွေ လက်ဆင့်ကမ်းနိုင်မယ်။ဒါမှလည်း နိုင်ငံတော်ကြီးအဓွန့်ရှည်အောင်စွမ်းဆောင်ရာမှာ၊ကျနော်တို့ တာဝန်ကျေပါ လိမ့်မယ်၊ ဒီတော့ မိမိရဲ့ပညာရပ်ကလေးထဲမှာပဲ နစ်မြုပ်မနေဘဲ(National identity)ကို နားလည်သဘောပေါက် စေမယ့် စာတွေအားလုံးဖတ်စေချင်ပါတယ်။

ဒီနေရာမှာ ကျနော်သတိရတဲ့ အချက်ကလေးတစ်ခုကို ဖြည့်စွက်ပြောပါရစေ။ “ဒီကနေ့(သင်ဟာ)ခြေလှမ်းစမလှမ်းဖြစ်ဘူးဆိုရင် နောက်နေ့ (သင်)ပြေးရလိမ့်မယ်”တဲ့။ မပြေးချင်ရင်အခုကတည်းက (စာဖတ်ခြင်း)ဆိုတဲ့ ခြေလှမ်းကောင်းကို စလိုက်စမ်းပါ။

ဦးသိန်းလွင်
ပါမောက္ခ၊ဌာနမှူး(ငြိမ်း)
စာကြည့်တိုက်နှင့်သုတပညာဌာန
ရန်ကုန်တက္ကသိုလ်
နာယက
မြန်မာနိုင်ငံစာကြည့်တိုက်အသင်း

Reference:

သိန်းလွင်၊ဦး(စာကြည့်တိုက်ပညာ)၊ပါမောက္ခ-။ “စာကြည့်တိုက်ပညာ(အာဆီယံ)ခရီးသည်”။ — ရန်ကုန်၊ ရွှေဟင်္သာစာပေ၊ ၂၀၁၉။ စာ၁၁-၁၂။
မှတ်ချက်။ ဆရာဦးသိန်းလွင် အမှတ်တရစကား ကို ဆရာ့စာအုပ်မှ ကောက်နှုတ်ကူးယူထားပါသည်။ ဆရာ့မိသားစုခွင့်ပြုချက်ရယူပြီးဖြစ်ပါသည်။