ဘီငါးလုံးတဲ့ဟေ့

စာကြည့်တိုက်တို့၏ ဆောင်ပုဒ်သည် ‘ပညာရှာသူ တို့ဝိုင်းကူ’ ဖြစ်ပါသည်။
စာကြည့်တိုက်တို့၏ မရှိမဖြစ်သော အင်္ဂါရပ်များတွင် စာအုပ်(Book)၊ အသိဉာဏ်(Brain)၊ ငွေကြေး(Budget)၊ အ‌ဆောက်အအုံ(Building)၊ စာငှားဖတ်သူ(Borrower)ဟူသည့် ဘီငါးလုံး ဝေါဟာရသည် Life Long Learning ဟူသော လူသားတို့၏ ဘဝတစ်လျှောက်လုံးတွင် လေ့လာသင်ယူခြင်းကဏ္ဍ၌ စံပြဖြစ်နေပါချေပြီ။
‘စာဖတ်သူတိုင်း စာဖတ်ဖို့ စာကြည့်တိုက်များ ထူထောင်စို့’ သဘောထားသည် စာကြည့်တိုက်ဖြင့် ခေတ်မီဖွံ့ဖြိုး တိုးတက်သော နိုင်ငံထူထောင်စေလိုခြင်းဟုပင် ယူဆရပါမည်။ စာကြည့်တိုက်တို့မည်သည့် စာဖတ်သူများ စာစုံစုံ လေ့လာ ဖတ်ရှုနိုင်သော နေရာဌာန ဖြစ်ရပါမည်။ စာအုပ်နှင့်ပြည်သူလူထုကို ဆက်သွယ်ပေးရာ၊ ပညာဗဟုသုတ ဖြန့်ဖြူးပေးရာ၊ ပညာဗဟုသုတ ရယူနိုင်ရာ၊ ပညာတတ်၊ ပညာရှင်၊ အသိမြင် အတတ်သင်နိုင်ရာနှင့် အမှားအမှန်ကို ဝေဖန်ပိုင်းခြားနိုင်သူများ မွေးဖွားပေးနိုင်ရာသာမက တစ်နည်းအားဖြင့် နိုင်ငံ့ကောင်းကျိုးပြုမည့် သားကောင်းသမီးကောင်းများ ပေါ်ထွန်းလာစေခြင်း ကြောင့် တိုင်းပြည်တိုးတက်ဖွံ့ဖြိုးရေးကို အထောက်အကူပေးခြင်းဟုလည်း ဆိုရပါမည်။
ဤသည်မှာ စာတတ်ရပါမည်။ စာတတ်ရုံနှင့် မကျေနပ်သင့်ပါ။ စာဖတ်ရပါမည်။ စာမဖတ်သူ ပပျောက်ရေးအထိ ဦးတည်ချက် ထားရှိရပါမည်။ စာဖတ်မှတ်ခြင်း၏အရသာ ကောင်းကျိုးဗဟုသုတမျိုးစုံသည် စာကြည့်တိုက်များကသာ အဓိကစွမ်းဆောင်နိုင်ပေမည်။ ကျေးရွာစာကြည့်တိုက်များ ရေရှည်တည်တံ့ခိုင်မြဲရေးတွင် စာကြည့်တိုက်တို့၏ မရှိမဖြစ် ဘီငါးလုံး ဝေါဟာရ လုပ်ငန်းရပ်သည် အဓိကကျလှသည်ဟု ဆိုချင်ပါသည်။
မြန်မာနိုင်ငံ စာကြည့်တိုက်လမ်းကြောင်း သမိုင်းကောင်းများတွင်ပင် ဖွင့်လိုက်၊ ပိတ်လိုက်၊ ပျက်သွားလိုက်၊ ဖျက်ဆီး လိုက်နှင့် ကမ္ဘာ့နိုင်ငံများနည်းတူ သက်ဆိုးမရှည်တတ်လေသော စာကြည့်တိုက်တို့ကား အများအပြားရှိခဲ့ဖူးကြသည်သာ မဟုတ်လား။ အောင်မြင့်ခဲ့လေပြီဖြစ်သော မြန်မာနိုင်ငံ၏ အသုံးလုံး(၁၉၆၄-၁၉၈၃) လှုပ်ရှားမှုကာလများတွင်ပင် ကောက်ရိုးမီးစိတ် ဓာတ်သဘောဖြင့် စာကြည့်တိုက်၊စာဖတ်ခန်းများစွာ ဖွင့်လှစ်နိုင်သကဲ့သို့ ပျက်စီးကွယ်ပျောက်မှုများလည်း ရှိခဲ့သည်ပဲ မဟုတ် လား။
ယနေ့ကျေးရွာစာကြည့်တိုက် အုတ်မြစ်ချခြင်းသဘော ကျေးလက်တောရွာတို့ရှိ ကိုယ့်အားကိုယ်ကိုး စာကြည့်တိုက် များ ပေါ်ပေါက်လာစေရေး၊ရေရှည်တည်တံ့ခိုင်မြဲရေး၊ကျေးရွာနေ ရွာသူရွာသားများ အလွယ်တကူ စာပေဖတ်ရှု ဗဟုသုရယူ ကြ၍ အချိန်ကိုအကျိုးရှိစွာ အသုံးချတတ်စေခြင်းများဖြင့် အမှားအမှန် ဝေဖန်ပိုင်းခြားနိုင်မည့် နိုင်ငံ့သားကောင်းများ ဖြစ်စေရေးမှာ စာဖတ်ခန်း၊ စာကြည့်တိုက်(စာအုပ် ၊ စာနယ်ဇင်းမျိုးစုံစုစည်းရာနေရာ)တို့ကသာ အဓိက ပံပိုးပေးနိုင်စွမ်း ရှိရပါသည်။ တစ်နည်းအားဖြင့် စာဖတ်သူရှိရာသို့ စာကြည့်တိုက်များ(mobile library အပါအဝင်)စာအုပ်၊ စာစောင်များ ရောက်ရှိ အသုံးဝင်စေသင့်အပ်ပြီ ထင်သည်။
စာကြည့်တိုက်(စာဖတ်ခန်း)တို့၏ သဘောသည် တစ်သက်တာ စာသင်ကျောင်းပမာပင် ဖြစ်ပါသည်။စာကြည့်တိုက် တွင် စာဖတ်မှတ်လေ့လာတတ်ခြင်းများဖြင့် အပန်းပြေ၊ စိတ်အာဟာရဖြစ်၊ လူ့အရင်းအမြစ်တို့၏ အခြေခံလိုအပ်ချက်တို့ကို ရယူ ကောင်းကျိုးပြုနိုင်စရာသာ ဖြစ်စေပါသည်။
သို့ဖြစ်၍ စေတနာပါ၊ ဝါသနာရှိ၊ အနစ်နာခံတတ်သည့် ကျေးလက်(တောရွာ)နေ စာတတ်ပေဖတ်(စာပေသမား၊ စာနယ်ဇင်းသမား)အပါအဝင် စာကြည့်တိုက်ပညာရပ် လုပ်ငန်းစဉ် အခြေခံသဘောသိ လူတစ်စုမှ လူအများသို့ ဦးဆောင် လမ်းညွှန်မည့် ချွန်သောသူများ မွေးဖွားတတ်စေသောဝ်…။

ဝန်ခံချက်
စာဖတ်ခြင်းနှင့်ကြီးမြတ်သောလူမျိုး(စာကြည့်တိုက်ပညာ ဆောင်းပါးများ စုစည်းတင်ဆက်မှု)၊ ရန်ကုန်၊ ပြန်/ဆက် ဦးစီး၊ ၂၀၀၁၊ အောက်တိုဘာထုတ် စာအုပ်၊ စာ ၁၄၇-၁၄၈ ဆောင်းပါးကို စာသားအချို့ ပြင်ဆင်ဖြည့်စွက်ထားပါသည်။

ဦးမြင့်ကြိုင်
နာယက
မြန်မာနိုင်ငံစာကြည့်တိုက်အသင်း